ஆஸ்கார் யூட்யூப் சேனலில் அதிகாரப்பூர்வமாக பதிவேற்றப்பட்ட முதல் தமிழ் படம் ஜெய் பீம் !

சூர்யா நடிப்பில் வெளியான ஜெய்பீம் திரைப்படத்தின் பாடல் மற்றும் காட்சிகள் புகழ்பெற்ற ஆஸ்கார் யூடியூப் சேனலில் பதிவேற்றப்பட்டுள்ளது தமிழ் சினிமா ரசிகர்களை உற்சாகப்படுத்தியுள்ளது. இப்படி பதிவேற்றப்படுகிற முதல் தமிழ் படம் ஜெய்பீம் என்பது குறிப்பிடத்தக்கது.

1993ம் ஆண்டு நடந்த உண்மை சம்பவத்தின் அடிப்படையில் உருவான திரைப்படமான இதை நடிகர் சூர்யா தனது 2டி என்டர்டெயின்மென்ட் சார்பாக தயாரித்திருந்தார். சூர்யாவுடன் இணைந்து மணிகண்டன், லிஜோமோல் ஜோஸ், பிரகாஷ்ராஜ் ஆகியோர் முக்கிய கதாபாத்திரத்தில் நடித்திருந்தார்கள்.

இருளர் பழங்குடி சமூகத்தைச் சேர்ந்தவர்களின் வாழ்வியல் துயரங்களை கண்முன்னே கொண்டு வந்து மனதை கனமாக்கி சென்றது இத்திரைப்படம். ஆனால், இப்படம் எந்த அளவிற்கு வரவேற்பை பெற்றதோ அந்த அளவிற்கு பெரும் சர்ச்சையில் சிக்கியது. சர்ச்சைகளுக்குப் பிறகு அக்காட்சிகள் படத்தில் இருந்து நீக்கப்பட்டு, படத்தின் இயக்குநர் ஞானவேல் மன்னிப்பும் கேட்டார். இந்நிலையில், உலகப் புகழ்பெற்ற ஆஸ்கார் யூடியூப் சேனலில் ஜெய்பீம் படத்தின் பாடல்களும் காட்சிகளும் இடம் பெற்றுள்ளன.