உலக தமிழர்களால் பெரிதும் ரசிக்கப்பட்ட நடிகர் தர்ஷன் தர்மராஜ் காலமானார் !

உலக தமிழர்களால் பெரிதும் ரசிக்கப்பட்ட ஈழத் தமிழ் நடிகர் தர்ஷன் தர்மராஜ் நேற்று காலமானார். இலங்கை திரைப்பட நடிகரான இவர் பல தமிழ் படங்களிலும் நடித்துள்ளார். மேலும், விடுதலைப் புலிகள் இயக்கத் தலைவர் பிரபாகரன் வேடத்தில் நடித்து, ரசிகர்களால் பெரிதும் கொண்டாடப்பட்டவர்.

இவருக்கு நேற்று திடீரென ஏற்பட்ட உடல்நலக் குறைவு காரணமாக கொழும்பில் உள்ள ஒரு தனியார் மருத்துவமனையில் அனுமதிக்கப்பட்டு சிகிச்சை பெற்று வந்தார். இந்நிலையில், நேற்று சிகிச்சை பலனின்றி உயிரிழந்தார்.

இவர் ‘பிரபாகரன்’, ‘சுனாமி’ உட்பட 25 க்கும் மேற்பட்ட சிங்கள மற்றும் தமிழ் திரைப்படங்களில் நடித்துள்ளார். மேலும், இவர் திரைத் துறையில் பல்வேறு விருதுகளையும் பெற்றுள்ளார். 2008 ஆம் ஆண்டு வெளியான ‘பிரபாகரன்’ என்ற இரு மொழி திரைப்படத்தில் – தமிழீழ விடுதலைப் புலிகளின் தலைவர் வேலுப்பிள்ளை பிரபாகரனாகப் நடித்து பெரிதும் புகழ் பெற்றார்.

இவர் நடிப்பில் வெளியான ‘இனி அவன்’ என்ற திரைப்படம் பிரான்ஸ் நாட்டின் ‘கான்’ திரைப்பட விழாவில் 2012 ஆம் ஆண்டு திரையிடப்பட்டது என்பது குறிப்பிடத்தக்கது.