தனக்கு கிடைக்கும் கேரக்டரை எந்த வித குறையும் இல்லாமல் நிறைவாகச் செய்யும் ஒரு திறமையான நடிகர் பிரசன்னா !

மலையாளத்தின் முக்கிய இயக்குனர் லோகிததாஸ் இயக்கத்தில் “கஸ்தூரிமான்” படத்தில் நடித்தார். அதன் பிறகு அவர் நடித்த “கண்ட நால் முதல்” கிருஷ்ணா கேரக்டர் எப்போதும் மனதுக்கு பிடித்தது. நம்ம வீட்டுப் பையன் போல், நமது தோள் மேல் கை போட்டு பேசும் நண்பன் போல அத்தனை இயல்பாக இருப்பார் அந்தப் படத்தில். ஆல்டைம் பேவரைட் மூவி. அதன் பிறகு அவருக்கு கிடைத்த லைப் டைம் வேடம் தான் “அஞ்சாதே”. அப்படி ஒரு வில்லன் கேரக்டரில் நடிக்க ஒரு ஹீரோ முன்வருவாரா என்பதே சந்தேகம். ஆனாலும் ஒரு இயக்குனரின் நடிகராக பிரசன்னாவின் அந்த கேரக்டர் தனிதன்மையுடன் இருந்தது. அதன்பிறகு அவரது படங்கள் பெரிய ஹிட் இல்லையென்றாலும் கவனம் பெற்றவை தான். நாணயம் இன்னொரு முக்கியமான, வித்தியாசமான படம். “பானா காத்தாடி” யில் லோக்கல்.ரவுடி வேடம்.

ஹீரோவாகத் தான் நடிப்பேன் என்ற கண்டிஷன் இல்லாமல் தனது திறமையை வெளிகாட்டக்கூடிய சிறிய வேடமாக இருந்தாலும் அதில் நடிப்பது பிரசன்னாவின் ஸ்டைல். அவர் நடித்த படங்களின் லிஸ்டை பார்த்தாலே நமக்கு தெரிகிறது. பெரும்பாலான படங்களை நாம் பார்த்திருப்போம். அனைத்துமே பெரிய வெற்றிப் படங்கள் இல்லையென்றாலும், நமது கவனம் ஈர்த்த படங்கள்.

சென்னையில் ஒரு நாள், புலிவால், முரண், திருட்டுப் பயலே படங்களில் நெகட்டிவ் கதாபாத்திரங்களில் நடித்திருப்பார். “கல்யாண சமையல் சாதம்” வித்தியாசமான படம். ப.பாண்டி, துப்பறிவாளன் இரண்டுமே அவர் பேர் சொல்லும் படங்கள் தான். சமீபத்தில் “ரனீதி” எனும் இந்தி சீரியலில் “அபிநந்தன்” கேரக்டராக நடித்திருந்தார்.

நடிகை ஸ்நேகாவை காதலித்து திருமணம் செய்து ரசிகர்களின் இதயங்களை நொறுக்கினார். சினிமாவில் மிகப்பெரிய வெற்றி கிடைக்கவில்லை என்றாலும், தனிப்பட்ட வாழ்வில் அவருக்கு ஜாக்பாட்டாக ஸ்நேகா கிடைத்தார். ரசிகர்கள் விரும்பும் அழகான ஜோடி.