ஜி.வி. பிரகாஷ் – பா. இரஞ்சித் கூட்டணியின் புதிய படம்: தலைப்பு மற்றும் ஃபர்ஸ்ட் லுக் வெளியீடு !

தமிழ் திரையுலகின் முன்னணி இசையமைப்பாளராகவும், பிஸியான நடிகராகவும் வலம் வருபவர் ஜி.வி. பிரகாஷ் குமார். சமீபத்தில் இவரது நடிப்பில் வெளியான ‘ஹேப்பி ராஜ்’ திரைப்படம் வணிக ரீதியாக நல்ல வரவேற்பைப் பெற்று திரையரங்குகளில் வெற்றிகரமாக ஓடிக்கொண்டிருக்கிறது.

இதற்கிடையில், தமிழ் மற்றும் தெலுங்கு படங்களில் இசையமைப்பாளராகவும், ‘ஜோ’ பட இயக்குநர் ஹரிஹரன் ராமின் புதிய படத்தில் கிரிக்கெட் வீரராகவும் நடித்து வரும் ஜி.வி. பிரகாஷ், அடுத்ததாக ஒரு முக்கிய படத்தில் கைகோர்த்துள்ளார்.

இயக்குநர் பா. இரஞ்சித்தின் ‘நீலம் புரொடக்ஷன்ஸ்’ மற்றும் ‘டிவைன் புரொடக்ஷன்ஸ்’ நிறுவனங்கள் இணைந்து தயாரிக்கும் புதிய திரைப்படத்தில் ஜி.வி. பிரகாஷ் குமார் கதாநாயகனாக நடித்துள்ளார்.

சென்னைப் பின்னணியை மையமாகக் கொண்டு உருவாகியுள்ள இந்தத் திரைப்படத்திற்கு ‘வெக்கை’ எனப் பெயரிடப்பட்டுள்ளதாக படக்குழு அதிகாரப்பூர்வமாக அறிவித்துள்ளது. அத்துடன் படத்தின் மிரட்டலான முதல் பார்வை (First Look) போஸ்டரையும் வெளியிட்டுள்ளது. இது தற்போது சமூக வலைத்தளங்களில் ரசிகர்களின் கவனத்தை ஈர்த்து வைரலாகி வருகிறது.

இயக்குநர் அறிமுகம்: பா.இரஞ்சித்திடம் நீண்டகாலம் இணை இயக்குநராகப் பணியாற்றிய அகிரன் மோசஸ் இந்த படத்தின் மூலம் இயக்குநராக அறிமுகமாகிறார்.பிரபல மலையாள நடிகர் ஸ்ரீநாத் பாசி இந்த படத்தில் வில்லனாக மிரட்டவுள்ளார்.இந்த படத்திற்கு ஜி.வி. பிரகாஷ் குமாரே இசையமைத்துள்ளார்.

நடிகராகவும் இசையமைப்பாளராகவும் ஜி.வி. பிரகாஷ் இந்த படத்தில் இரட்டைப் பொறுப்பேற்றுள்ளதால், படத்தின் பாடல்கள் மற்றும் பின்னணி இசை மீதான எதிர்பார்ப்பு அதிகரித்துள்ளது. அகிரன் மோசஸின் அறிமுக இயக்கம் மற்றும் பா. இரஞ்சித்தின் தயாரிப்பு என்பதால், படம் ஒரு அழுத்தமான கதைக்களத்தைக் கொண்டிருக்கும் என நம்பப்படுகிறது.

‘வெக்கை’ திரைப்படத்தின் இறுதிக்கட்டப் பணிகள் விறுவிறுப்பாக நடைபெற்று வரும் நிலையில், அடுத்த சில மாதங்களில் படம் திரையரங்குகளில் வெளியாகும் என எதிர்பார்க்கப்படுகிறது.