படங்களுக்கு இடையிலான இடைவெளி ஏன்? இவானா விளக்கம் !

ஒவ்வொரு படத்திற்கும் இடையில் நீண்ட இடைவெளி எடுத்துக்கொள்வது ஏன் என்பது குறித்து நடிகை இவானா விளக்கம் அளித்துள்ளார்.

இயக்குநர் பாலா இயக்கத்தில் வெளியான ‘நாச்சியார்’ திரைப்படம் மூலம் தமிழ் சினிமாவில் அறிமுகமானவர் நடிகை இவானா. தொடர்ந்து மலையாளத் திரைப்படங்களில் கவனம் செலுத்திய அவர், பிரதீப் ரங்கநாதன் இயக்கி நடித்த ‘லவ் டுடே’ திரைப்படத்தின் மூலம் மீண்டும் தமிழ் ரசிகர்களின் கவனத்தை ஈர்த்தார். இப்படம் அவருக்குத் திரையுலகில் முக்கியமான திருப்புமுனையாக அமைந்தது. தொடர்ந்து ‘டிராகன்’ உள்ளிட்ட படங்களிலும் நடித்துள்ளார்.

தற்போது நடிகர் ஜீவாவுடன் இணைந்து ‘ஜாலியா இருந்த ஒருத்தன்’ திரைப்படத்தில் நடித்துள்ளார். காதல், காதல் கலந்த நகைச்சுவை பின்னணியில் உருவாகியுள்ள இப்படம் குறித்து பேசிய இவானா, உறவிலிருந்து திருமணம் வரையிலான காலகட்டத்தில் நடக்கும் சுவாரஸ்யமான சம்பவங்கள் மற்றும் சிக்கல்களை நகைச்சுவையாக இப்படம் எடுத்துரைக்கும் என்று தெரிவித்துள்ளார்.

மேலும், ஒவ்வொரு திரைப்படத்திற்கும் இடையில் அதிக கால இடைவெளி எடுத்துக்கொள்வது ஏன் என்று பலரும் கேள்வி எழுப்புவதாகக் குறிப்பிட்டுள்ளார்.

இதற்கு பதிலளித்த அவர், அதிகமான படங்களில் நடிப்பதைவிட தனக்குப் பொருத்தமான, தரமான கதைகளைத் தேர்வு செய்து நடிக்கவே விரும்புவதாகத் தெரிவித்துள்ளார். ஒரு கதையைக் கேட்கும்போது அந்தக் கதாபாத்திரம் தனக்குப் பொருத்தமாக இருக்கிறதா, அதைத் தன்னால் சிறப்பாகச் செய்ய முடியுமா என்பதைப் பார்த்த பிறகே படங்களில் நடிக்க ஒப்புக்கொள்வதாகவும் கூறியுள்ளார்.

சினிமா பின்னணி இல்லாத குடும்பத்தில் இருந்து வந்த தான், ஒரு நாள் நடிகையாவேன் என்று நினைத்துக்கூடப் பார்த்ததில்லை என்றும், ஆனால் இன்று தமிழ் சினிமாவில் தனக்கென ஓர் இடம் கிடைத்திருப்பது மகிழ்ச்சி அளிப்பதாகவும் தெரிவித்துள்ளார்.

மேலும், அடுத்த பத்து ஆண்டுகளுக்குப் பிறகும் சினிமாவில் இருப்பேனா என்பது தனக்குத் தெரியாது என்றும், ஆனால் இவானா என்ற நடிகை நல்ல திரைப்படங்களில் நடித்தார் என்ற பெயர் கிடைத்தாலே போதும் என்றும் மனம் திறந்து பேசியுள்ளார்.