News

ஜீவாவின் ‘தகப்பன்’ படத்தின் ‘சொக்க வச்சாளே’ இரண்டாவது சிங்கிள் வெளியானது !

Published

on

நடிகர் ஜீவா நடிப்பில், லார்க் ஸ்டூடியோஸ் தயாரிப்பில், இயக்குநர் ரா. வெங்கட் இயக்கத்தில் உருவாகி வரும் திரைப்படம் ‘தகப்பன்’. இப்படத்திலிருந்து ‘சொக்க வச்சாளே’ எனும் இரண்டாவது சிங்கிள் பாடல் தற்போது வெளியாகி ரசிகர்களின் கவனத்தை ஈர்த்துள்ளது.

மார்ஷல் ராபின்சன் இசையமைத்துள்ள இப்பாடலுக்கு மோகன் ராஜன் பாடல் வரிகளை எழுதியுள்ளார். ஹரிசரண், சைந்தவி மற்றும் நாராயணன் ரவிசங்கர் இணைந்து இப்பாடலைப் பாடியுள்ளனர்.

ஏற்கெனவே வெளியான ‘தங்கபுள்ள’ முதல் பாடல் தந்தை – மகன் உறவின் அன்பையும் உணர்வுகளையும் வெளிப்படுத்திய நிலையில், தற்போது வெளியாகியுள்ள ‘சொக்க வச்சாளே’ பாடல் கணவன் – மனைவி இடையிலான காதல், ரொமான்ஸ் மற்றும் அழகான இல்லற வாழ்க்கையை மையமாகக் கொண்டு உருவாக்கப்பட்டுள்ளது.

மென்மையான இசையுடன் அழகிய மெலடியாக அமைந்துள்ள இப்பாடல், புதுமணத் தம்பதிகளின் காதல், நெருக்கம், அன்புப் பரிமாற்றம் என அவர்களுடைய வாழ்க்கையின் இனிமையான தருணங்களை அழகாகப் பதிவு செய்கிறது. குறிப்பாக, எந்தவித விரசமும் இல்லாமல் குடும்பத்துடன் அமர்ந்து ரசிக்கும் வகையில் பாடல் காட்சிகள் அமைந்துள்ளன. அதேபோல், கதையின் முக்கியத் திருப்பங்களையும் கதாபாத்திரங்களின் வாழ்க்கைப் பயணத்தையும் பாடலின் வழியாகவே வெளிப்படுத்தியிருப்பது கூடுதல் சிறப்பாகும்.

படத்தின் ஃப்ளாஷ்பேக் காட்சிகளின் தொகுப்பாகவும், கதையின் முக்கியமான திருப்புமுனையாகவும் இப்பாடல் அமைந்துள்ளது. லாரி ஓட்டுநராக இருக்கும் நாயகனுக்கும், வசதியான குடும்பத்தைச் சேர்ந்த நாயகிக்கும் இடையே மலரும் காதல், பெற்றோரின் எதிர்ப்பை மீறி கோயிலில் திருமணம் செய்துகொள்வது, பின்னர் ஊருக்கு ஒதுக்குப்புறத்தில் உள்ள சிறிய கிராமத்து வீட்டில் அவர்கள் தொடங்கும் புதிய வாழ்க்கை எனப் பாடலின் காட்சிகள் நகர்கின்றன.

புதுமணத் தம்பதிகளின் அன்றாட ரொமான்ஸ், கர்ப்பமடையும் மகிழ்ச்சியான தருணம் என அழகாகச் செல்லும் அவர்களது வாழ்க்கையில், நாயகியின் அம்மாவிடமிருந்து வரும் தொலைபேசி அழைப்புகள் ஏற்படுத்தும் மாற்றங்களும் சுவாரசியமாகக் காட்சிப்படுத்தப்பட்டுள்ளன.

மதுரை மற்றும் அதன் சுற்றுவட்டாரப் பகுதிகளைப் பின்னணியாகக் கொண்டு உருவாகியுள்ள இப்படம், அப்பா – மகன் உறவு, குடும்பப் பாசம் மற்றும் மனித உணர்வுகளை மையமாகக் கொண்டுள்ளது. ‘தெனாவட்டு’ படத்திற்குப் பிறகு முழுக்க முழுக்க கிராமத்துப் பின்னணியில் ஜீவா நடிக்கும் இப்படத்தில், ரஜிஷா விஜயன் கதாநாயகியாக நடித்துள்ளார்.

K. குமார் தயாரிக்கும் இப்படத்திற்கு M. சுகுமார் ஒளிப்பதிவு செய்கிறார். நாகூரான் ராமச்சந்திரன் படத்தொகுப்புப் பணிகளை மேற்கொள்கிறார். படத்தின் இசை வெளியீட்டு உரிமையை திங்க் மியூசிக் நிறுவனம் பெற்றுள்ளது. மேலும், படம் நிறைவடைவதற்கு முன்பே சாட்டிலைட் ஒளிபரப்பு உரிமையை ZEE தமிழ் நிறுவனமும், OTT உரிமையை ZEE5 நிறுவனமும் கைப்பற்றியுள்ளன.

வரும் டிசம்பர் 24-ம் தேதி வெளியாகவுள்ள ‘தகப்பன்’ திரைப்படத்தின் மீதான எதிர்பார்ப்பு நாளுக்கு நாள் அதிகரித்து வருகிறது. அந்த எதிர்பார்ப்பை மேலும் உயர்த்தும் விதமாக தற்போது வெளியாகியுள்ள ‘சொக்க வச்சாளே’ இரண்டாவது சிங்கிள் ரசிகர்களிடையே வரவேற்பைப் பெற்று வருகிறது.

Trending

Exit mobile version