ஜனநாயகன்’ லீக்: “கனவுகளும் கடின உழைப்பும் வீணாகிவிட்டது” – மமிதா பைஜு உருக்கம் !

ஹெச்.வினோத் இயக்கத்தில் தளபதி விஜய் நடித்துள்ள ‘ஜனநாயகன்’ திரைப்படம் இணையத்தில் கசிந்த விவகாரம் திரையுலகினரிடையே பெரும் அதிர்ச்சியை ஏற்படுத்தியுள்ளது. இது குறித்து தனது வேதனையைப் பகிர்ந்துள்ளார் நடிகை மமிதா பைஜு.

கே.வி.என் புரொடக்ஷன்ஸ் தயாரிப்பில் உருவான ‘ஜனநாயகன்’ திரைப்படம், தணிக்கை வாரியத்துடனான சில சிக்கல்கள் காரணமாக திரையரங்குகளில் வெளியாகாமல் தாமதமாகி வந்தது. இந்நிலையில், சில தினங்களுக்கு முன்பு படத்தின் முழுப் பதிப்பும் இணையத்தில் கசிந்து படக்குழுவினருக்குப் பெரும் பொருளாதார நஷ்டத்தையும், மன உளைச்சலையும் ஏற்படுத்தியது. இந்த விவகாரம் தொடர்பாகத் தமிழக காவல்துறை துரிதமாகச் செயல்பட்டு, இதுவரை 6 பேரைக் கைது செய்துள்ளது குறிப்பிடத்தக்கது.

இப்படத்தில் மிக முக்கியமான கதாபாத்திரத்தில் நடித்துள்ள மமிதா பைஜு, இந்தச் சம்பவம் குறித்து ஊடகங்களிடம் பேசியபோது:

“இது மிகவும் ஏமாற்றமாகவும் வேதனையாகவும் இருக்கிறது. எத்தனையோ பெரிய கனவுகளும், பலரின் கடின உழைப்பும் இந்த ஒரு செயலால் வீணாகிப் போயுள்ளது. எங்களது உழைப்பு நிச்சயமாக இதற்குத் தகுதியானது அல்ல.

ஆரம்பத்தில் சமூக வலைதளங்களில் இதுகுறித்த செய்திகளைப் பார்த்தபோது என்னால் நம்ப முடியவில்லை. ஆனால், என் சகோதரர் தான் இந்தத் தகவலை உறுதிப்படுத்தினார். ஏன் இப்படிச் செய்கிறார்கள்? இந்த லீக் என்பது மிகவும் துரதிஷ்டவசமானது.”

ஒரு பெரிய பட்ஜெட் படம் தணிக்கை சிக்கலில் இருக்கும்போதே இணையத்தில் வெளியானது ஒட்டுமொத்தத் தயாரிப்புத் தரப்பையும் நிலைகுலையச் செய்துள்ளது. திருட்டுத்தனமாகப் படங்களை இணையத்தில் வெளியிடுபவர்கள் மீது கடுமையான நடவடிக்கை எடுக்கப்பட வேண்டும் எனப் பலரும் கோரிக்கை விடுத்து வருகின்றனர்.

தற்போது லீக் ஆன போதிலும், சட்ட ரீதியான தடைகளைத் தாண்டி ‘ஜனநாயகன்’ விரைவில் திரையரங்குகளில் வெளியாகும் என ரசிகர்கள் ஆவலுடன் காத்திருக்கின்றனர்.