காதலும் கலவரமும் கலந்த ‘மேரேஜ் ஸ்டோரி’ – டீசர் வெளியானது !

கல்லூரிக் காதல், குடும்பக் குழப்பம், எதிர்பாராத திருமணம் என நகைச்சுவை, காதல், ஆக்‌ஷன் கலந்த கதைக்களத்துடன் உருவாகியுள்ள ‘மேரேஜ் ஸ்டோரி’ திரைப்படத்தின் அதிகாரப்பூர்வ டீசர் வெளியாகியுள்ளது.

‘அதோமுகம்’ திரைப்படத்தைத் தயாரித்த ரீல் பெட்டி (Reel Petti) நிறுவனம் தயாரிப்பில் உருவாகியுள்ள புதிய திரைப்படம் ‘மேரேஜ் ஸ்டோரி’ (Marriage Story). இப்படத்தை சுனில் தேவ் எழுதி இயக்கியுள்ளார். இப்படத்தின் அதிகாரப்பூர்வ டீசர் தற்போது Saregama Tamil யூடியூப் சேனலில் வெளியாகி ரசிகர்களின் கவனத்தை ஈர்த்துள்ளது.

நட்சத்திரக் கூட்டணி மற்றும் தொழில்நுட்பக் குழு

இப்படத்தில் எஸ்.பி. சித்தார்த் மற்றும் ஷபானா ஷாஜஹான் ஆகியோர் முதன்மைக் கதாபாத்திரங்களில் நடித்துள்ளனர். தீபன் சக்கரவர்த்தி இசையமைத்துள்ள இப்படத்திற்கு சுனில் சேகர் ஒளிப்பதிவு செய்துள்ளார். நிமல் அன்சாரி படத்தொகுப்புப் பணிகளை மேற்கொண்டுள்ளார்.

காதலா… கல்யாணமா… இல்லை கலவரமா?

கல்லூரிப் பருவத்தில் மலரும் காதல், காதலிக்கு வீட்டில் மாப்பிள்ளை பார்க்கத் தொடங்கியதும் ஏற்படும் குழப்பங்கள் என இளைஞர்களின் வாழ்க்கையில் நிகழும் சுவாரஸ்யமான சம்பவங்களை மையமாகக் கொண்டு இப்படத்தின் கதை அமைந்துள்ளது.

காதலி கவிக்கு வீட்டில் திருமண ஏற்பாடுகள் தொடங்குவதால், நாயகன் தர்ஷன் அவளை அழைத்துக்கொண்டு ஊரை விட்டுச் செல்லத் திட்டமிடுகிறான். ஆனால், எதிர்பாராத திருப்பங்கள் காரணமாக நாயகனின் நண்பர்கள் மற்றும் குடும்பத்தினரிடையே மோதல்கள் வெடிக்கின்றன.

“ஒரு சாதாரண காதல் கதை… கல்யாணத்துல முடியலாம், இல்ல கலவரமா மாறலாம்… கல்யாணமும் ஆகி, கலவரமும் ஆனா?” என்ற வசனம் டீசரின் முக்கிய ஈர்ப்பாக அமைந்துள்ளது.

காதல், நகைச்சுவை, குடும்ப உறவுகள் மற்றும் ஆக்‌ஷன் எனப் பல அம்சங்களைக் கலந்து உருவாகியுள்ள இப்படம் ரசிகர்களிடையே எதிர்பார்ப்பை ஏற்படுத்தியுள்ளது.

நவம்பர் 27-ல் திரையரங்குகளில் வெளியீடு!

சுனில் தேவ் இயக்கத்தில் உருவாகியுள்ள ‘மேரேஜ் ஸ்டோரி’ திரைப்படம் வரும் நவம்பர் 27-ஆம் தேதி திரையரங்குகளில் வெளியாக உள்ளது. டீசரைத் தொடர்ந்து படத்தின் மீதான எதிர்பார்ப்பு அதிகரித்துள்ள நிலையில், ரசிகர்களின் வரவேற்பைப் பெறுமா என்பதைப் பொறுத்திருந்து பார்ப்போம்.