ஹிப்ஹாப் ஆதியின் ‘மீசையமுறுக்கு 2’ வெளியானது துள்ளலான “கோயிந்தம்மா” பாடல் !

ஹிப்ஹாப் ஆதி இயக்கி, நாயகனாக நடித்து வரும் ‘மீசையமுறுக்கு 2’ திரைப்படத்தின் புதிய பாடலான “கோயிந்தம்மா” இன்று வெளியாகி இணையத்தில் வைரலாகி வருகிறது.

கடந்த 2017-ஆம் ஆண்டு ஹிப்ஹாப் ஆதியின் இயக்கம் மற்றும் நடிப்பில் வெளியாகி, இளைஞர்கள் மத்தியில் மாபெரும் வெற்றி பெற்ற திரைப்படம் ‘மீசையமுறுக்கு’. இதன் வெற்றியைத் தொடர்ந்து, பல ஆண்டுகள் கழித்து தற்போது இப்படத்தின் இரண்டாம் பாகம் ‘மீசையமுறுக்கு 2’ என்ற பெயரில் விறுவிறுப்பாக உருவாகி வருகிறது. சுந்தர் சி-யின் ‘அவ்னி மூவிஸ்’ நிறுவனம் இப்படத்தை பிரமாண்டமாக தயாரிக்கிறது.

இப்படத்தில் ஹிப்ஹாப் ஆதிக்கு ஜோடியாக நடிகை கேத்திகா ஷர்மா நடிக்கிறார். மேலும், பிரபல யூடியூபர் ஹர்ஷத் கான் ஒரு முக்கிய கதாபாத்திரத்தில் களமிறங்கியுள்ளார்.

ஏற்கனவே ‘மீசையமுறுக்கு 2’ படத்தில் இடம்பெற்றுள்ள ‘ஆரா 10/10’, ‘பப்பாளி பழமே’ ஆகிய பாடல்கள் வெளியாகி ரசிகர்கள் மத்தியில் சிறப்பான வரவேற்பைப் பெற்ற நிலையில், தற்போது படத்தின் அடுத்த அதிரடியாக “கோயிந்தம்மா” பாடல் இன்று (மே 21) மாலை அதிகாரப்பூர்வமாக வெளியாகியுள்ளது.

இப்பாடலை பாடகர்கள் கௌஷிக் கிரிஷ், கானா வினோத், கானா உலகம் தரணி மற்றும் கானா சுதாகர் ஆகியோர் இணைந்து பாடியுள்ளனர். வழக்கமான ஹிப்ஹாப் ஆதியின் ஸ்டைலில் பக்கா மாஸான கானா இசையில் உருவாகியுள்ள இப்பாடல், வெளியான சில மணி நேரங்களிலேயே யூடியூபில் நல்ல பார்வைகளைப் பெற்று ரசிகர்களை வெகுவாக கவர்ந்து வருகிறது.