News
வாலி மோகன் தாஸ் இயக்கத்தில் ‘புரொடக்ஷன் நம்பர் 01’ – தொடங்கியது முதல் கட்டப் படப்பிடிப்பு!
‘ரங்கோலி’, ‘மெட்ராஸ்காரன்’ ஆகிய திரைப்படங்களை இயக்கிய வாலி மோகன் தாஸ், தனது அடுத்த திரைப்படமான ‘புரொடக்ஷன் நம்பர் 01’ படத்தை இயக்கி வருகிறார். இப்படத்தின் முதல் கட்டப் படப்பிடிப்பு தற்போது விறுவிறுப்பாக நடைபெற்று வருகிறது.
இந்தியா ஃபிலிம் கம்பெனியின் முதல் தயாரிப்பாக உருவாகும் இப்படத்தில் தேஜய் அருணாசலம் கதாநாயகனாக நடிக்கிறார். திவிஜா பிரபாகர் கதாநாயகியாகத் தமிழ் திரையுலகில் அறிமுகமாகிறார்.
அனைத்து வயதினரும் குடும்பத்துடன் அமர்ந்து ரசிக்கும் வகையில், முழுமையான குடும்பப் பொழுதுபோக்குத் திரைப்படமாக இப்படம் உருவாகி வருகிறது.
இப்படத்தை வாலி மோகன் தாஸ் தயாரித்து இயக்குகிறார். இதன் கதை மற்றும் திரைக்கதைப் பணிகளை வாலி மோகன் தாஸ் மற்றும் உமர் எஸ். இணைந்து மேற்கொண்டுள்ளனர். சாம் சி.எஸ். இசையமைக்க, ஆர்தர் ஏ. வில்சன் ஒளிப்பதிவு செய்கிறார்.
இந்தியா ஃபிலிம் கம்பெனி, ஸ்ரீ சுமனோஹரா புரொடக்ஷன்ஸ் மற்றும் கிராட்டிட்யூட் புரொடக்ஷன்ஸ் ஆகிய நிறுவனங்கள் இணைந்து இப்படத்தைத் தயாரிக்கின்றன.
கடந்த 2023-ம் ஆண்டு வெளியான ‘ரங்கோலி’ திரைப்படத்தின் மூலம் இயக்குநராக அறிமுகமான வாலி மோகன் தாஸ், தொடர்ந்து ஷேன் நிகம், நிஹாரிகா கொனிடேலா மற்றும் கலைராசன் நடிப்பில் வெளியான ‘மெட்ராஸ்காரன்’ திரைப்படத்தை இயக்கியிருந்தார். இவ்விரு படங்களுக்குப் பிறகு அவர் இயக்கும் புதிய திரைப்படம் என்பதால், ‘புரொடக்ஷன் நம்பர் 01’ படத்தின் மீது ரசிகர்கள் மத்தியில் எதிர்பார்ப்பு அதிகரித்துள்ளது.
தற்போது படப்பிடிப்பு விறுவிறுப்பாக நடைபெற்று வரும் நிலையில், படத்தின் அடுத்தடுத்த அறிவிப்புகள் மற்றும் கூடுதல் தகவல்களைத் தெரிந்துகொள்ள ரசிகர்கள் ஆவலுடன் காத்திருக்கின்றனர்.
குடும்பங்கள் கொண்டாடும் வகையிலான கதைக்களத்துடன் உருவாகி வரும் ‘புரொடக்ஷன் நம்பர் 01’ திரைப்படம் ரசிகர்களிடம் எந்த அளவிற்கு வரவேற்பைப் பெறும் என்பதைப் பொறுத்திருந்து பார்ப்போம்.
