விஜய் இயக்கத்தில் உருவாகியுள்ள காதல் ரீசெட் ரிபீட் படத்தின் டீசர் வெளியானது !

Malali Manvi Movie Makers, D Studios, சன்னி டென்வி (Denvi Productions) தயாரிப்பில், பிரபா பிரேம்குமார் இணை தயாரிப்பில், விஜய் இயக்கத்தில் உருவாகியுள்ள ‘காதல் ரீசெட் ரிபீட்’ திரைப்படத்தின் டீசர் நேற்று அதிகாரப்பூர்வமாக வெளியிடப்பட்டுள்ளது.

முன்னணி இசையமைப்பாளர் ஹாரிஸ் ஜெயராஜ் இசையில் முன்னதாக வெளியான பாடல்கள் ரசிகர்களிடம் மாபெரும் வரவேற்பைப் பெற்றுள்ள நிலையில், புதுமையான காதல் கதையை மையமாகக் கொண்ட இப்படத்தின் டீசர் சமூக வலைத்தளங்களில் வெளியான சில மணி நேரங்களிலேயே வைரலாகி, திரையுலக வட்டாரங்களிலும் பேசுபொருளாக மாறியுள்ளது.

ஒரு அழகான காதல் கதையாக தொடங்கும் டீசர், ‘ரீசெட்’ – ‘ரிபீட்’ என்ற தலைப்புக்கேற்றவாறு எதிர்பாராத திருப்பங்களுடன் மெதுவாக வேறு பாதைக்கு நகர்கிறது. உணர்ச்சி பூர்வமான தருணங்கள், புதுமையான கதை சொல்லல் பாணி மற்றும் திடீர் மாற்றங்கள் மூலம் பார்வையாளர்களின் ஆர்வத்தை தூண்டும் விதமாக அமைந்துள்ளது. இது ஒரு சாதாரண காதல் கதை அல்ல… எந்த வகையான காதல் கதை என்பதே புரியாத அளவுக்கு பல ஆச்சரியங்களை தன்னகத்தே கொண்ட படமாக ‘காதல் ரீசெட் ரிபீட்’ இருக்கும் என்பதை டீசர் உறுதியாக சுட்டிக்காட்டுகிறது.

மலையாள சினிமாவின் முன்னணி நட்சத்திரமான அர்ஜுன் அசோகன் முக்கிய கதாபாத்திரத்தில் நடிக்கும் இப்படத்தில், மதும்கேஷ் – ஜியா சங்கர் ஜோடி மைய கதாபாத்திரங்களில் இணைந்துள்ளனர். இவர்களுடன் எம். எஸ். பாஸ்கர், ஜெயபிரகாஷ், விஜி சந்திரசேகர் உள்ளிட்ட பல திறமையான கலைஞர்கள் இணைந்து நடித்துள்ளனர்.

தமிழ் திரையுலகிற்கு பல புதுமுகங்களை அறிமுகப்படுத்தி வரும் இயக்குநர் விஜய், இத்திரைப்படத்தின் மூலம் மதும்கேஷ் – ஜியா சங்கர் ஜோடியை அறிமுகப்படுத்தியிருப்பது குறிப்பிடத்தக்கது.

இசையமைப்பாளர் ஹாரிஸ் ஜெயராஜ் இசையில் உருவான பாடல்கள், காதலும் உணர்ச்சியும் கலந்த மெலடிகளால் ரசிகர்களை கவரும் வகையில் அமைந்துள்ளன. ஒளிப்பதிவாளர் அரவிந்த் கிருஷ்ணா காட்சிகளுக்கு தனித்துவமான காட்சித் தரத்தை வழங்கியுள்ளார். ஆண்டனி படத்தொகுப்பை மேற்கொண்டுள்ள நிலையில், கலை இயக்கத்தை சரவணன் வசந்த், சண்டை இயக்கத்தை மனோகர் வர்மா, உடை வடிவமைப்பை ருச்சி முனோத் கவனித்துள்ளனர். பாடல் வரிகளை வைரமுத்து, மதன் கார்கி, ஆர்கஸ் ஆர்யன் ஆகியோர் எழுதியுள்ளனர்.

இப்படத்தின் இசை உரிமையை T-Series நிறுவனம் கைப்பற்றியுள்ளது.

டீசர் தற்போது இணையம் முழுவதும் பெரும் வரவேற்பைப் பெற்று வரும் நிலையில், படத்தை திரையரங்குகளுக்கு கொண்டு வரும் பணிகளில் படக்குழு தீவிரமாக செயல்பட்டு வருகிறது.

மார்ச் 6 ஆம் தேதி ‘காதல் ரீசெட் ரிபீட்’ திரைப்படம் உலகம் முழுவதும் திரையரங்குகளில் வெளியாகவுள்ளது. தமிழகமெங்கும் வெளியீட்டை Romeo Pictures நிறுவனம் மேற்கொள்கிறது. விரைவில் இப்படத்தின் இசை வெளியீடும், டிரெய்லர் குறித்த அதிகாரப்பூர்வ அறிவிப்புகளும் வெளியாகும் என படக்குழு தெரிவித்துள்ளது.