முதலமைச்சர் விஜய்க்கு வெங்கட் பிரபு அளித்த ‘மாஸ்’ பரிசு !

தமிழக முதலமைச்சராக பொறுப்பேற்றுள்ள நடிகர் விஜயை நேரில் சந்தித்த இயக்குனர் வெங்கட் பிரபு, ‘GOAT’ திரைப்படத்தில் பயன்படுத்தப்பட்ட பிரத்யேக நம்பர் பிளேட்டை அவருக்கு நினைவுப் பரிசாக வழங்கியுள்ளார். இந்த புகைப்படங்கள் தற்போது சமூக வலைத்தளங்களில் வைரலாகி வருகின்றன.

30 ஆண்டு கால சினிமா முதல் கோட்டை வரை: தமிழ் திரையுலகில் 30 ஆண்டுகளுக்கும் மேலாக முன்னணி நடிகராக வலம் வந்து, கோடிக்கணக்கான ரசிகர்களின் நெஞ்சங்களில் சிம்மாசனம் போட்டு அமர்ந்தவர் விஜய். தனது ரசிகர் மன்றங்களை ‘விஜய் மக்கள் இயக்கமாக’ மாற்றி, கடந்த பல வருடங்களாகவே பல்வேறு சமூக சேவைகளிலும், அரசியல் நகர்வுகளிலும் அவர் ஈடுபட்டு வந்தார்.

இதனைத் தொடர்ந்து, கடந்த இரண்டு வருடங்களுக்கு முன்பு ‘தமிழக வெற்றிக் கழகம்’ என்ற பெயரில் அதிகாரப்பூர்வமாக தனது அரசியல் கட்சியைத் தொடங்கினார். மக்கள் மத்தியில் கிடைத்த அமோக ஆதரவின் மூலம், தற்போது நடந்து முடிந்த தேர்தலில் மாபெரும் வெற்றி பெற்று தமிழகத்தின் முதலமைச்சராகப் பதவியேற்றுள்ளார். அவரின் இந்த இமாலய வெற்றிக்கு பல்வேறு துறைகளைச் சேர்ந்தவர்களும், குறிப்பாக திரையுலகைச் சேர்ந்தவர்களும் தங்களது நெஞ்சார்ந்த வாழ்த்துக்களைத் தெரிவித்து வருகின்றனர்.

அன்றே கணித்த வெங்கட் பிரபு: விஜய்யின் வெற்றிச் செய்தியைக் கொண்டாடும் விதமாக, திரைப்பட இயக்குனர் வெங்கட் பிரபு, சென்னை நீலாங்கரையில் உள்ள முதலமைச்சர் விஜய்யின் இல்லத்திற்கு நேரில் சென்று தனது வாழ்த்துக்களைத் தெரிவித்தார்.

இந்த சந்திப்பின் போது சுவாரஸ்யமான நிகழ்வு ஒன்று அரங்கேறியுள்ளது. சமீபத்தில் வெங்கட் பிரபு இயக்கத்தில் விஜய் நடிப்பில் வெளியான ‘கோட்’ (GOAT) திரைப்படத்தில், விஜய் ஓட்டி வரும் காரின் பதிவு எண் ‘DL 07 PM 2029’ என்று காட்டப்பட்டிருக்கும். விஜய்யின் அரசியல் எதிர்காலத்தை முன்கூட்டியே கணிப்பது போல் அமைந்த இந்த காட்சி, தற்போது நிஜமாகியுள்ள நிலையில் இணையத்தில் பேசுபொருளாகியுள்ளது. தேர்தல் முடிவுகள் வெளியானவுடனேயே, வெங்கட் பிரபுவின் சகோதரரும் நடிகருமான பிரேம்ஜி, திரைப்படத்தின் அந்த குறிப்பிட்ட ஸ்கிரீன்ஷாட்டைப் பகிர்ந்து ‘அன்றே சொன்னார் வெங்கட் பிரபு’ எனப் பெருமையுடன் பதிவிட்டிருந்தார்.

வைரலாகும் ‘நம்பர் பிளேட்’ கிஃப்ட்: இந்நிலையில், நீலாங்கரையில் முதல்வர் விஜயை சந்தித்த வெங்கட் பிரபு, கோட் திரைப்படத்தில் பயன்படுத்தப்பட்ட அதே ‘DL 07 PM 2029’ என்ற நம்பர் பிளேட்டை ஃப்ரேம் செய்து அவருக்குச் சிறப்புப் பரிசாக வழங்கியுள்ளார். முதலமைச்சர் விஜய் அதனை இன்முகத்துடன் பெற்றுக் கொண்டார்.

தற்போது இந்த சந்திப்பின் போது எடுக்கப்பட்ட புகைப்படங்கள் இணையத்தில் வெளியாகி, விஜய் ரசிகர்களாலும் திரையுலக வட்டாரத்தினராலும் அதிக அளவில் பகிரப்பட்டு வைரலாகி வருகிறது.