வித் லவ் – திரைவிமர்சனம் !

Cast: Abishan Jeevinth, Anaswara Rajan, Harish Kumar, Kavya Anil, Sacchin Nachiappan, Theni Murugan and Saravanan
Production: Zion Films, MRP Entertainment
Director: Madhan
Screenplay: Madhan
Cinematography: Shreyaas Krishna
Editing: Suresh Kumar
Music: Sean Roldan
Language: Tamil
Runtime: 2 Hours 21 Mins
Release Date: February 8, 2026

டூரிஸ்ட் பேமிலி படத்தின் இயக்குநர் அபிஷன் ஜீவிந்த் மற்றும் நடிகை அனஸ்வரா ராஜன் நடிப்பில் இயக்குநர் சௌந்தர்யா ரஜினிகாந்த் தயாரிப்பில் வெளியாகியுள்ள திரைப்படம் வித் லவ்.

சென்னையில் வசிக்கும் இளைஞன் அபிஷன் ஜீவிந்த், தனது அக்காவின் வற்புறுத்தலால் திருமணப் பேச்சுக்காக அனஸ்வரா ராஜனை ஒரு காபி ஷாப்பில் சந்திக்கிறார். ஆரம்பத்தில் வழக்கமான அறிமுக உரையாடலாக தொடங்கும் அந்த சந்திப்பு, இருவரும் திருச்சியில் ஒரே பள்ளியில் படித்த முன்னாள் மாணவர்கள் என்பதை அறிந்துகொள்ளும் தருணத்தில் திசை மாறுகிறது. பள்ளி நாட்களின் நினைவுகள், முதல் காதல் பற்றிய இனிய தருணங்கள் இருவரையும் பழைய காலத்துக்கே அழைத்துச் செல்கின்றன.

“நாம் காதலித்தவர்கள் இப்போது என்ன செய்கிறார்கள்?” என்ற ஆர்வம் அவர்களை நேரடியாக திருச்சிக்குப் பயணம் செய்ய தூண்டுகிறது. அபிஷன் தனது பள்ளிக் கால காதலி காவ்யாவை சந்தித்தாரா? அனஸ்வரா தனது காதலன் சச்சினை மீண்டும் பார்த்தாரா? அந்த முன்னாள் காதலர்களின் வாழ்க்கை, மனநிலை, திருமண நிலை போன்ற கேள்விகளுக்கான பதில்களே ‘வித்லவ்’ திரைப்படத்தின் மையக் கதையாக விரிகிறது. இந்த படத்தை புதுமுக இயக்குநர் மதன் இயக்கியுள்ளார்.

‘டூரிஸ்ட் பேமிலி’ என்ற வெற்றிப் படத்தை வழங்கிய அபிஷன் ஜீவிந்த், இந்த திரைப்படத்தின் மூலம் ஹீரோவாக அறிமுகமாகிறார். அவருக்கு ஜோடியாக பிரபல மலையாள நடிகை அனஸ்வரா ராஜன் நடித்துள்ளார். இருவரின் சந்திப்பு, பயணம், கருத்து மோதல்கள், காதல் உணர்வுகள் ஆகியவை படத்தின் முக்கிய தூண்களாக அமைந்துள்ளன. இளைஞர்கள் உருவாக்கிய, இளைஞர்களே நடித்த இந்த படம் முழுக்க முழுக்க இளமைத் துள்ளலோடு நகர்கிறது. காதல், வாழ்க்கை, குடும்பம் குறித்த அவர்களின் பார்வை, பேசும் மொழி, எண்ண ஓட்டங்கள் இயல்பாக வெளிப்படுகின்றன. இருப்பினும், பாரம்பரிய சிந்தனையோடு பழகியவர்களுக்கு இந்த படம் முழுமையாக கனெக்ட் ஆகாமல் போகும் வாய்ப்பும் உள்ளது.

ஹீரோவாக அபிஷன், நடுத்தர குடும்பத்தைச் சேர்ந்த இளைஞனாக நன்றாக ஸ்கோர் செய்துள்ளார். வருங்கால மனைவியை சந்திக்கும் தருணங்கள், பள்ளிக் கால காதலை பகிரும் காட்சிகள், திருச்சிக்குச் சென்று பழைய காதலியை சந்திப்பது, அனஸ்வரா தனது காதலனை பார்க்கும் தருணங்களில் அவர் அளித்துள்ள நடிப்பு பாராட்டத்தக்கது. குறிப்பாக, திருச்சி பள்ளி பகுதி காட்சிகளில் அவர் மிகவும் கியூட்டாகத் தெரிகிறார். மாணவன் கெட்-அப்பும் அவருக்கு இயல்பாக பொருந்தியுள்ளது. காதலை சொல்லத் தயங்கும் தருணங்கள், பல ஆண்டுகளுக்குப் பிறகு காதலியை சந்திக்கும் போது ஏற்படும் தடுமாற்றம், கடைசியில் காதல் கைவிடுமோ என்ற பயத்தில் லூட்டி ஆகும் காட்சிகள் ரசிக்க வைக்கின்றன. செயற்கை ஹீரோயிசம் இல்லாத அவரது நடிப்பு, தமிழுக்கு ஒரு புதிய முகம் கிடைத்திருக்கிறது என்ற உணர்வை ஏற்படுத்துகிறது.

அதே நேரத்தில், சில இடங்களில் ஓவர் ஆக்டிங் தெரிகிறது. அதை சற்று குறைத்திருக்கலாம். சில காட்சிகளில் பிரதீப் ரங்கநாதன் சாயல் வருவதையும் தவிர்த்திருக்கலாம். ஆக்‌ஷன் பக்கம் போகாமல், இதே இயல்பான பாதையில் தொடர்வதே அவருக்கு நல்லது. நண்பர்களாக வரும் நடிகர்களும் நம்முடைய பள்ளி நாட்களை நினைவூட்டும் வகையில் இயல்பாக நடித்துள்ளனர்.

படத்தின் மிகப்பெரிய பிளஸ் அனஸ்வரா ராஜனின் நடிப்புதான். மோனிஷா கதாபாத்திரமாக அவர் வெளிப்படுத்தும் உடல் மொழி, தைரியமான முடிவுகள், அழகான உரையாடல்கள் அனைத்தும் கவனம் ஈர்க்கின்றன. காபி ஷாப்பில் தொடங்கி, சென்னை, திருச்சி என அனைத்து இடங்களிலும் இன்றைய மாடர்ன் பெண்ணாக அவர் கலக்குகிறார். பள்ளி பகுதியிலும், காதல் காட்சிகளிலும் அவரது நடிப்பு மனதில் நிற்கிறது. கோபம் கூட அழகாக வெளிப்படுகிறது. ஹீரோவுடன் அவரின் கெமிஸ்ட்ரி பக்காவாக அமைந்துள்ளது. ஆனால், பேசும் இடங்களில் மலையாள வாடை அதிகமாக இருப்பது ஒரு குறை. சொந்த குரலுக்கு பதிலாக வேறு ஒருவர் டப்பிங் பேசியிருந்தால் அந்த பாத்திரம் இன்னும் ஆழமாக பதிந்திருக்கும். இளைஞர்கள் அனஸ்வராவை கொண்டாடுவார்கள் என்பதில் சந்தேகமில்லை.

அபிஷனின் காதலியாக வரும் காவ்யா கதாபாத்திரத்தில் நடித்துள்ள நடிகை, பள்ளி பகுதி காட்சிகளில் அமைதியான நடிப்பின் மூலம் கவனம் ஈர்க்கிறார். இரண்டாம் பாதியில் அவர் காட்டும் மாற்றம் பார்வையாளர்களிடம் கைதட்டல் பெறுகிறது. அதேபோல், அனஸ்வராவின் காதலனாக வரும் சச்சின் நாச்சியப்பனும் கிளைமாக்ஸ் பகுதிகளில் குறுகிய நேரத்தில் தன் தாக்கத்தை பதிய வைக்கிறார். திருச்சி பள்ளி ஆசிரியராக வரும் சரவணன், ஹீரோவின் அக்காவாக வரும் ஆர்.ஜே. ஆனந்தி, அப்பாவாக வரும் முருகேசன் ஆகியோர் குறைந்த நேரமே வந்தாலும் நினைவில் நிற்கும் கதாபாத்திரங்களாக அமைந்துள்ளனர்.

சென்னை காட்சிகள் அழகாக இருந்தாலும், திருச்சி பள்ளி ஃபிளாஷ்பேக் காட்சிகள் இன்னும் சிறப்பாக வடிவமைக்கப்பட்டுள்ளன. அவற்றைப் பார்க்கும் போது பார்வையாளர்களுக்கு தங்களின் பள்ளி நாட்கள், நண்பர்கள், ஆசிரியர்கள், முதல் காதல், தயக்கம், அவமானம் போன்ற நினைவுகள் தானாகவே மனதில் ஓடுகின்றன. கிளைமாக்ஸ் மிகைப்படுத்தப்பட்ட எக்ஸ்பெரிமென்ட்களின்றி, சோகத்தையும் தவிர்த்து, கலகலப்பாக முடிவது படத்திற்கு ஒரு நல்ல ப்ளஸ். ஷ்ரேயாஸ் ஒளிப்பதிவு திருச்சி நகரத்தையும், பள்ளி காட்சிகளையும் அழகாக பிடித்திருக்கிறது. சின்ன சின்ன வசனங்களும், பாசிட்டிவ் தருணங்களும் ரசிக்க வைக்கின்றன.

இருப்பினும், திரைக்கதையில் திருப்பங்களும் விறுவிறுப்பும் குறைவாக உள்ளது. “இதுதான் நடக்கப்போகிறது” என்ற கணிப்பு பல இடங்களில் உண்மையாகி விடுவது படத்தின் முக்கிய பலவீனம். ‘ஆட்டோகிராப்’, ‘பள்ளிக்கூடம்’ போன்ற படங்களின் தாக்கம் நினைவுக்கு வருகிறது. இரண்டாம் பாதியில் இருக்கும் வேகம், முதல் பாதியில் குறைவாக உள்ளது. மேலும், படம் முழுவதும் ஏதாவது ஒரு கதாபாத்திரம் தொடர்ந்து பேசிக்கொண்டே இருப்பதும் சில நேரங்களில் சலிப்பை ஏற்படுத்துகிறது. காதல் கதையை அழுத்தமாக சொல்லாமல், காமெடி கலந்த எளிய முறையில் கடத்தியிருப்பது ‘வித்லவ்’ படத்தை ஒரு சராசரி ரொமான்டிக் டிராவல் டிராமாவாக மாற்றிவிடுகிறது.

Rating 3/5