வெற்றிமாறன் இயக்கத்தில் சிம்பு நடிக்கும் அரசன் படப்பிடிப்பு மீண்டும் ஆரம்பம் !

நீண்ட நாட்களாக ரசிகர்களால் பெரிதும் எதிர்பார்க்கப்பட்ட சிலம்பரசன் – வெற்றிமாறன் கூட்டணியில் உருவாகி வரும் ‘அரசன்’ படத்தின் படப்பிடிப்பு மீண்டும் தொடங்கியுள்ளதாக அதிகாரப்பூர்வமாக அறிவிக்கப்பட்டுள்ளது.

சில காரணங்களால் நிறுத்தி வைக்கப்பட்டிருந்த இந்த படத்தின் படப்பிடிப்பு தற்போது மீண்டும் முழு வீச்சில் தொடங்கியுள்ளது. இதுகுறித்த மகிழ்ச்சியான தகவலை படத்தின் தயாரிப்பாளர் கலைப்புலி எஸ்.தாணு தனது அதிகாரப்பூர்வ ‘எக்ஸ்’ (X) தள பக்கத்தில் தெரிவித்துள்ளார்.

அவர் வெளியிட்டுள்ள பதிவில், ‘அரசன் செயல்பாட்டுக்குத் திரும்பி விட்டான்’ (Arasan Back in Action) எனக் குறிப்பிட்டு, சிலம்பரசனும் இயக்குநர் வெற்றிமாறனும் படப்பிடிப்பு தளத்தில் தீவிரமாக விவாதித்துக் கொண்டிருக்கும் பிரத்யேக புகைப்படத்தையும் இணைத்துள்ளார்.

‘வட சென்னை’ யுனிவர்ஸ்: இயக்குநர் வெற்றிமாறனின் பிளாக்பஸ்டர் ஹிட்டான ‘வட சென்னை’ படத்தின் சினிமாடிக் யுனிவர்ஸாக இந்த ‘அரசன்’ படம் உருவாகி வருவது குறிப்பிடத்தக்கது. இதில் நடிகர் சிலம்பரசன் மூன்று வித்தியாசமான தோற்றங்களில் நடித்து வருவதாக கூறப்படுகிறது. மேலும், மக்கள் செல்வன் விஜய் சேதுபதி இதில் ஒரு மிக முக்கிய கதாபாத்திரத்தில் நடிக்கிறார்.

வி.கிரியேஷன்ஸ் சார்பில் கலைப்புலி எஸ்.தாணு பிரம்மாண்டமாக தயாரிக்கும் இப்படத்திற்கு ராக்ஸ்டார் அனிருத் இசையமைக்கிறார். இவர்களுடன் அமீர், சமுத்திரக்கனி, கிஷோர், ஆண்ட்ரியா உள்ளிட்ட பல முன்னணி நட்சத்திரங்கள் இணைந்து நடிக்கின்றனர்.

‘அரசன்’ படப்பிடிப்பு மீண்டும் தொடங்கியுள்ள செய்தி, சிம்பு மற்றும் வெற்றிமாறன் ரசிகர்களிடையே பெரும் உற்சாகத்தை ஏற்படுத்தியுள்ளது.