பொங்கல் பண்டிகைக்கு வெளியாகும் அருள்நிதியின் ‘டிமான்டி காலனி 3’ !

தமிழ் சினிமாவில் திகில் திரைப்படங்களுக்கு தனி ரசிகர் பட்டாளத்தை உருவாக்கிய ‘டிமான்டி காலனி’ திரைப்படத்தின் மூன்றாம் பாகம் பொங்கல் பண்டிகையை முன்னிட்டு வெளியாகும் என படக்குழு அறிவித்துள்ளது.

இயக்குநர் அஜய் ஞானமுத்து இயக்கத்தில் அருள்நிதி நடிப்பில் கடந்த 2015-ம் ஆண்டு வெளியான ‘டிமான்டி காலனி’ திரைப்படம் ரசிகர்களிடையே நல்ல வரவேற்பைப் பெற்றது. இதனைத் தொடர்ந்து 2024-ம் ஆண்டு வெளியான இரண்டாம் பாகமும் வசூல் ரீதியாக கவனம் ஈர்த்தது.

இதன் தொடர்ச்சியாக உருவாகியுள்ள ‘டிமான்டி காலனி 3’ திரைப்படத்தில் அருள்நிதியுடன் பிரியா பவானி சங்கர் உள்ளிட்ட பலர் நடித்துள்ளனர்.

படப்பிடிப்பு மற்றும் தயாரிப்புப் பணிகள் நிறைவடைந்த நிலையில், இப்படத்தின் வெளியீட்டுத் தேதி ஏற்கனவே சில முறை ஒத்திவைக்கப்பட்டது. குறிப்பாக, செப்டம்பர் 11-ம் தேதி வெளியாகும் என அறிவிக்கப்பட்டிருந்த நிலையில், அப்போதும் படம் திரைக்கு வரவில்லை.

இந்நிலையில், தீபாவளியை முன்னிட்டு படக்குழு வெளியிட்டுள்ள புதிய போஸ்டரில், ‘டிமான்டி காலனி 3’ திரைப்படம் பொங்கல் பண்டிகைக்கு வெளியாகும் என அறிவிக்கப்பட்டுள்ளது.

தொடர்ந்து தள்ளிப்போன படத்தின் வெளியீட்டுத் தேதி தற்போது அறிவிக்கப்பட்டுள்ளதால், திகில் திரைப்பட ரசிகர்கள் மத்தியில் எதிர்பார்ப்பு அதிகரித்துள்ளது.