லோகேஷ் கனகராஜ் நாயகனாக அறிமுகமாகும் டிசி திரைப்படத்தின் டிரைலர் வெளியீடு !

தமிழ் சினிமாவின் முன்னணி இயக்குநரான லோகேஷ் கனகராஜ் முதன்முறையாக நாயகனாக களம் இறங்கும் திரைப்படம் “டிசி” (DC). இப்படத்தின் டிரைலர் வெளியீடு குறித்த அதிகாரப்பூர்வ அறிவிப்பை படக்குழு வெளியிட்டுள்ளது, இது ரசிகர்களிடையே பெரும் எதிர்பார்ப்பை ஏற்படுத்தியுள்ளது.

இயக்குநர் அருண் மாதேஸ்வரன் இயக்கத்தில் உருவாகியுள்ள இந்தத் திரைப்படத்தில், லோகேஷ் கனகராஜ் ‘தேவதாஸ்’ என்ற முதன்மை கதாபாத்திரத்தில் நடித்துள்ளார். அவருக்கு ஜோடியாக நடிகை வாமிகா கபி ‘சந்திரா’ என்ற கதாபாத்திரத்தில் நடித்துள்ளார். மேலும், சஞ்சனா ஏகே ‘பார்வதி’ என்ற கதாபாத்திரத்தில் நடித்துள்ளார்.

சன் பிக்சர்ஸ் நிறுவனம் தயாரிக்கும் இப்படத்தின் டிரைலர், உலகப் புகழ்பெற்ற கான்ஸ் திரைப்பட விழாவில் (Cannes Film Festival) வரும் மே 15 ஆம் தேதி (இன்று) திரையிடப்படவுள்ளது. சர்வதேச அளவில் இப்படம் கவனம் ஈர்க்கும் வகையில் இந்தத் திரையிடல் திட்டமிடப்பட்டுள்ளது. அதே நாளில் மாலை 6 மணிக்கு இணையதளத்திலும் டிரைலர் வெளியாகும் என அறிவிக்கப்பட்டுள்ளது.

ஏற்கனவே வெளியான இப்படத்தின் ‘கிளிம்ஸ்’ வீடியோவில், வாமிகா மற்றும் சஞ்சனா பாலியல் தொழிலாளர்களாகவும், லோகேஷ் கனகராஜ் ஒரு கேங்ஸ்டராகவும் நடிப்பது போன்ற காட்சிகள் இடம் பெற்றிருந்தன. அருண் மாதேஸ்வரனின் முந்தைய படங்களான ‘ராக்கி’, ‘சாணிக்காயிதம்’ மற்றும் ‘கேப்டன் மில்லர்’ போன்றே, இந்தப் படமும் ஒரு அதிரடியான பழிவாங்கும் கதையாக இருக்கும் என்று எதிர்பார்க்கப்படுகிறது.

இப்படத்தின் படப்பிடிப்பு கடந்த ஏப்ரல் மாதமே நிறைவடைந்த நிலையில், மே மாதம் இறுதிக்குள் படத்தை வெளியிடத் தயாரிப்பு நிறுவனம் திட்டமிட்டுள்ளது. இயக்குநர் அவதாரத்திலிருந்து நடிகர் அவதாரத்திற்கு மாறும் லோகேஷ் கனகராஜைக் காண ஒட்டுமொத்தத் திரையுலகமும் ஆவலுடன் காத்திருக்கிறது.