ராம் சரண் நடிக்கும் ‘பெத்தி’ படத்தின் டிரைலர் வெளியீடு !

ராம் சரண் நடிப்பில் இயக்குநர் புச்சி பாபு சனா இயக்கத்தில் உருவாகியுள்ள ‘பெத்தி’ (Peddi) படத்தின் மிரட்டலான டிரைலர் இன்று வெளியாகி இணையத்தில் வைரலாகி வருகிறது. விளையாட்டு வீரரின் வாழ்க்கையை மையமாகக் கொண்ட இந்த படம் வருகிற ஜூன் 4-ஆம் தேதி திரையரங்குகளில் பிரம்மாண்டமாக வெளியாகவுள்ளது.

தெலுங்கு திரையுலகின் முன்னணி நட்சத்திரமான நடிகர் ராம் சரண் நடிப்பில் நீண்ட நாட்களாகத் தயாராகி வந்த திரைப்படம் ‘பெத்தி’. ‘உப்பனா’ படத்தின் மூலம் கவனம் ஈர்த்த இயக்குநர் புச்சி பாபு சனா இந்த திரைப்படத்தை இயக்கியுள்ளார். இந்தப் படத்தில் ராம் சரணுக்கு ஜோடியாக பாலிவுட் இளம் நடிகை ஜான்வி கபூர் நடித்துள்ளார். மேலும், கன்னட திரையுலகின் சூப்பர் ஸ்டார் சிவராஜ்குமார் ஒரு முக்கிய கதாபாத்திரத்தில் நடித்துள்ளார்.

பெரும் பொருட்செலவில் பான் – இந்தியா முறையில் உருவாகியுள்ள இந்தப் படத்தினை முன்னணி தயாரிப்பு நிறுவனமான மைத்ரி மூவி மேக்கர்ஸ் (Mythri Movie Makers) மற்றும் இயக்குநர் சுகுமாரின் ‘சுகுமார் ரைட்டிங்ஸ்’ ஆகிய நிறுவனங்கள் இணைந்து தயாரித்துள்ளன. இப்படத்திற்கு இசைப்புயல் ஏ.ஆர்.ரஹ்மான் இசையமைத்துள்ளார்.

உள்ளூர் விளையாட்டு வீரரான நாயகன் பெத்தி, தனது திறமையால் பல்வேறு தடைகளைத் தாண்டி எப்படி தேசிய அளவிலான விளையாட்டுப் போட்டியில் கலந்துகொள்கிறான் என்பதையே மையக் கதையாகக் கொண்டு இப்படம் உருவாகியுள்ளது.

நீண்ட நாட்களாக தயாரிப்பில் இருந்து வந்த ‘பெத்தி’ படத்தின் எடிட்டிங் மற்றும் இறுதிக்கட்ட பணிகள் முடிவடைந்துவிட்ட நிலையில், படம் ஜூன் 4-ஆம் தேதி வெளியாகும் என அதிகாரப்பூர்வமாக அறிவிக்கப்பட்டுள்ளது. இந்நிலையில் இன்று வெளியாகியுள்ள இப்படத்தின் டிரைலர், ராம் சரண் ரசிகர்கள் மத்தியில் படத்தின் மீதான எதிர்பார்ப்பை பல மடங்கு அதிகரித்துள்ளது.

தற்போது இந்த டிரைலர் யூடியூப் மற்றும் சமூக வலைத்தளங்களில் அதிக பார்வைகளைப் பெற்று ட்ரெண்டாகி வருகிறது.