ரூ.8 கோடி சம்பளம் கேட்டேனா? – வதந்திகளுக்கு முற்றுப்புள்ளி வைத்த ‘கே.ஜி.எஃப்’ நடிகை ஸ்ரீநிதி ஷெட்டி !

‘கே.ஜி.எஃப்’ திரைப்படங்கள் மூலம் பான்-இந்தியா அளவில் பிரபலமானவர் நடிகை ஸ்ரீநிதி ஷெட்டி. தமிழில் விக்ரமின் ‘கோப்ரா’ படத்திலும் நடித்திருந்த இவர், தற்போது வெங்கடேஷின் ‘ஆதர்ஷ குடும்பம்’ என்ற தெலுங்கு திரைப்படத்தில் இரண்டு குழந்தைகளுக்குத் தாயாக நடித்து வருகிறார்.

இந்நிலையில், ‘கே.ஜி.எஃப்’ வெற்றிக்கு பிறகு இவர் தன்னிடம் வரும் புதிய படங்களுக்கு ரூ. 8 கோடி வரை சம்பளம் கேட்பதாக திரைவட்டாரங்களில் செய்திகள் பரவின. தற்போது இந்த தகவல் குறித்து ஸ்ரீநிதி ஷெட்டி விளக்கம் அளித்து வதந்திகளுக்கு முற்றுப்புள்ளி வைத்துள்ளார்.

சமீபத்தில் அவர் அளித்த பேட்டியில் இதுகுறித்துப் பேசுகையில், “கே.ஜி.எஃப் படங்களின் வெற்றிக்குப் பிறகு நான் ரூ.7 முதல் ரூ.8 கோடி வரை சம்பளம் கேட்பதாக சொல்கிறார்கள். நான் இதுவரை நடித்த திரைப்படங்களின் எண்ணிக்கை மிகக் குறைவு. அப்படியிருக்கும் போது என்னால் எப்படி அவ்வளவு பெரிய தொகையை சம்பளமாகக் கேட்க முடியும்? அது முற்றிலும் வதந்திதான்.

‘கே.ஜி.எஃப்’ படங்களுக்குப் பிறகு நான் அவசரப்பட்டு திரைப்படங்களை ஒப்புக்கொள்ளவில்லை. பணம் சம்பாதிப்பது மட்டுமே எனக்கு நோக்கமாக இருந்திருந்தால், கடந்த சில ஆண்டுகளில் என்னால் 30 முதல் 40 திரைப்படங்களில் நடித்திருக்க முடியும். ஆனால், வெறும் பணத்துக்காக படங்களை ஒப்புக்கொள்ளாமல், நல்ல கதைக்கும் தரமான கதாபாத்திரங்களுக்கும் மட்டுமே நான் முன்னுரிமை அளிக்கிறேன்” என்று திட்டவட்டமாகத் தெரிவித்துள்ளார்.

இதன் மூலம், சம்பளம் குறித்து பரவி வந்த தேவையற்ற வதந்திகளுக்கு அவர் முற்றுப்புள்ளி வைத்துள்ளார்.