தமிழக முதல்வர் விஜய்யை நேரில் சந்தித்த நடிகர் கவின்: நெகிழ்ச்சிப் பதிவு வைரல் !

சின்னத்திரையில் தொடங்கி இன்று வெள்ளித்திரையின் முன்னணி நாயகனாக ஜொலிக்கும் நடிகர் கவின், தமிழக முதல்வர் ச. ஜோசப் விஜய்யை நேரில் சந்தித்து வாழ்த்துப் பெற்றுள்ளார். இந்தச் சந்திப்பு குறித்த அவரது உருக்கமான பதிவு சமூக வலைதளங்களில் வைரலாகி வருகிறது.

சின்னத்திரை தொடர்கள் மூலம் மக்கள் மனதில் இடம்பிடித்து, பின்னர் ‘டாடா’, ‘பிளடி பெக்கர்’, ‘மாஸ்க்’ போன்ற அடுத்தடுத்த வெற்றித் திரைப்படங்கள் மூலம் தமிழ்த் திரையுலகின் முன்னணி நடிகராக உயர்ந்திருப்பவர் நடிகர் கவின். இவர் இன்று (ஜூலை 9) தமிழக முதலமைச்சர் ச. ஜோசப் விஜய்யை நேரில் சந்தித்து உரையாடியுள்ளார்.

இந்தச் சந்திப்பிற்கான ஏற்பாடுகளை முதல்வரின் தனிச்செயலாளர் ஜகதீஷ் பழனிசாமி செய்திருந்தார். முதலமைச்சருடனான சந்திப்பு குறித்து நடிகர் கவின் தனது அதிகாரப்பூர்வ சமூக ஊடகப் பக்கத்தில் நெகிழ்ச்சியோடு பதிவிட்டுள்ளார்.

அதில், “சில மனிதர்கள் இயல்பாகவே மற்றவர்களுக்கு உத்வேகம் அளிக்கக்கூடியவர்களாக இருப்பார்கள். காலம் அவரது பயணத்தை (அரசியலை நோக்கி) மாற்றியிருக்கலாம்; ஆனால், அவரது பணிவோ, எளிமையோ, கனிவோ ஒருபோதும் மாறவில்லை. திரையில் அவரைப் பார்த்து வளர்ந்த லட்சக்கணக்கான ரசிகர்களில் நானும் ஒருவன். இன்று அவர் தமிழக முதல்வராக மக்களுக்குச் சேவை செய்வதைப் பார்ப்பது தொடர்ந்து உத்வேகம் அளிக்கிறது. என் வாழ்நாள் முழுவதும் நான் போற்றிப் பாதுகாக்கும் தருணம் இது” என்று கவின் குறிப்பிட்டுள்ளார். மேலும், தனது நீண்ட நாள் ஆசையை நிறைவேற்றிய ஜகதீஷ் பழனிசாமிக்கு தனது நன்றியையும் தெரிவித்துள்ளார்.