கீர்த்தி சுரேஷ் மிரட்டல் நடிப்பில் ‘அக்கா’ வெப் சீரிஸ் டிரைலர் வெளியீடு !

திரையுலகில் வித்தியாசமான கதைக் களங்களைத் தேர்ந்தெடுத்து நடித்து வரும் நடிகை கீர்த்தி சுரேஷ், தற்போது முதன்மை கதாபாத்திரத்தில் நடித்துள்ள புதிய வெப் சீரிஸ் ‘அக்கா’ (Akka). பெண்களை மையமாகக் கொண்ட கேங்ஸ்டர் கதையாக உருவாகியுள்ள இத்தொடரின் விறுவிறுப்பான டிரைலர் தற்போது வெளியாகி ரசிகர்களின் கவனத்தை ஈர்த்து வருகிறது.

1980-களின் பின்னணியில் ஒரு கற்பனை உலகம் :

பிரபல தயாரிப்பு நிறுவனமான யஷ் ராஜ் ஃபிலிம்ஸ் என்டர்டெயின்மென்ட் (YRF Entertainment) தயாரித்துள்ள இத்தொடரை, அறிமுக இயக்குநர் தர்மராஜ் ஷெட்டி எழுதி இயக்கியுள்ளார்.

1980-ஆம் ஆண்டுகளின் பின்னணியில் அமைக்கப்பட்டுள்ள இக்கதை, ‘பெர்னூரு’ என்ற கற்பனையான இடத்தைச் சுற்றி நகர்கிறது. தலைமுறை தலைமுறையாகப் பெண்களால் மட்டுமே கட்டமைக்கப்பட்டு, ஆளப்பட்டு, பாதுகாப்பாகப் பராமரிக்கப்பட்டு வரும் ஒரு விசித்திரமான சமூகத்தை இத்தொடர் பார்வையாளர்களுக்கு அறிமுகப்படுத்துகிறது.

கீர்த்தி சுரேஷ் VS ராதிகா ஆப்தே :

தற்போது வெளியாகியுள்ள டிரைலரில், நடிகை கீர்த்தி சுரேஷ் தனக்கென ஒரு பெண்கள் படையை அமைத்துத் தலைவியாக வாழ்ந்து வருகிறார். ஆனால், அவர்களின் இந்த உலகத்தை அழிக்கும் சக்திவாய்ந்த வில்லி கதாபாத்திரத்தில் பிரபல நடிகை ராதிகா ஆப்தே நடித்து மிரட்டியுள்ளார். இவர்கள் இருவருக்கும் இடையே நடக்கும் அதிகாரப் போட்டியும் மோதல்களுமே கதையின் முதன்மை அமைப்பாகத் தெரிகிறது.

ஓடிடி ரிலீஸ் தேதி விவரம்:

மிகுந்த எதிர்பார்ப்பை ஏற்படுத்தியுள்ள இந்த ‘அக்கா’ தொடர், வரும் அக்டோபர் 30-ஆம் தேதி முதல் பிரபல ஓடிடி தளமான நெட்பிளிக்ஸில் (Netflix) நேரடியாக ஒளிபரப்பாகவுள்ளது.