வெற்றி நடிப்பில் உருவாகியுள்ள ‘லஷ்மிகாந்தன் கொலை வழக்கு’ ட்ரைலர் வெளியானது !

தமிழ்த் திரையுலகில் ஒரு காலத்தில் பெரும் பரபரப்பை ஏற்படுத்திய உண்மைச் சம்பவத்தை மையமாக வைத்து உருவாகியுள்ள ‘லஷ்மிகாந்தன் கொலை வழக்கு’ திரைப்படத்தின் அதிகாரப்பூர்வ டிரைலர் வெளியாகி இணையத்தில் ரசிகர்களின் கவனத்தை ஈர்த்து வருகிறது.

தமிழ் சினிமாவின் முதல் சூப்பர் ஸ்டாரான எம்.கே. தியாகராஜ பாகவதர் மற்றும் என்.எஸ். கிருஷ்ணன் ஆகியோரின் வாழ்க்கையைத் தலைகீழாக மாற்றிய வரலாற்றுச் சம்பவம் தான் ‘லட்சுமிகாந்தன் கொலை வழக்கு’. ‘இந்துநேசன்’ என்ற இதழை நடத்தி வந்த லட்சுமிகாந்தன், அப்போதைய திரையுலகப் பிரபலங்கள் குறித்து அவதூறான செய்திகளைத் தொடர்ந்து எழுதி வந்தார். இதனால் அவர் கூலிப்படையினரால் படுகொலை செய்யப்பட்டார்.

இந்த வழக்கில் குற்றஞ்சாட்டப்பட்ட பாகவதரும், என்.எஸ்.கே-வும் கைது செய்யப்பட்டு ஆயுள் தண்டனை பெற்றனர். தமிழகத்தையே உலுக்கிய இந்தச் சம்பவத்தில், 4 ஆண்டுகள் சிறைத்தண்டனைக்கு பிறகு லண்டன் பிரிவு கவுன்சில் மேல்முறையீட்டின் மூலம் இருவரும் விடுதலை செய்யப்பட்டனர். இன்றும் பல்வேறு கோணங்களில் விவாதிக்கப்படும் இந்தச் சம்பவத்தை அடிப்படையாகக் கொண்டு இப்படம் உருவாகியுள்ளது.

‘கொன்றால் பாவம்’ திரைப்படத்தை இயக்கிய தயாள் பத்மநாபன் இப்படத்தை இயக்கியுள்ளார். 2எம் சினிமாஸ் (2M Cinemas) நிறுவனம் தயாரிக்கும் இப்படத்தில், முன்னணி கதாபாத்திரங்களில் நடிகர் வெற்றி மற்றும் நடிகை பிரிகிடா சகா நடித்துள்ளனர். இவர்களுடன் கவிதா பாரதி, ரங்கராஜ் பாண்டே, சுப. வீரபாண்டியன் ஆகியோர் முக்கிய வேடங்களில் நடித்துள்ளனர்.

இப்படத்திற்கு தர்புகா சிவா இசையமைத்துள்ளார். சமீபத்தில் இப்படத்தின் முதல் பாடலான ‘காதல் செய்வீர்’ வெளியாகி வரவேற்பைப் பெற்ற நிலையில், தற்போது விறுவிறுப்பான டிரைலரையும் படக்குழு வெளியிட்டுள்ளது.

வரலாற்றுப் பின்னணியுடன் உருவாகியுள்ளதால் ரசிகர்கள் மத்தியில் பேசுபொருளாகியுள்ள ‘லஷ்மிகாந்தன் கொலை வழக்கு’ திரைப்படம், வருகிற ஜூலை 10-ஆம் தேதி முதல் உலகமெங்கும் திரையரங்குகளில் வெளியாகும் என அதிகாரப்பூர்வமாக அறிவிக்கப்பட்டுள்ளது.