நீண்ட போராட்டத்திற்குப் பின் வெளியாகும் முதல்வரின் ‘ஜனநாயகன்’ ஜூலை 23-ல் திரைக்கு வருகிறது !

தணிக்கை குழுவின் இழுபறி, இணையதள கசிவு என பல தடைகளைத் தாண்டி, முதலமைச்சர் விஜய்யின் கடைசி படமான ‘ஜனநாயகன்’ படம் வரும் ஜூலை 23-ஆம் தேதி உலகமெங்கும் பிரம்மாண்டமாக வெளியாகவுள்ளது.

6 மாத காத்திருப்புக்கு எண்டு கார்டு: எச்.வினோத் இயக்கத்தில் விஜய், பூஜா ஹெக்டே, மமிதா பைஜூ மற்றும் பலர் நடிப்பில் உருவாகியுள்ள திரைப்படம் ‘ஜனநாயகன்’. விஜய்யின் கடைசி திரைப்படமான இது, கடந்த ஜனவரி 9-ஆம் தேதியே வெளியாக வேண்டியது. ஆனால், தணிக்கை சான்றிதழ் (சென்சார்) வழங்குவதில் ஏற்பட்ட தாமதம் மற்றும் அடுத்தடுத்த நீதிமன்ற வழக்குகளால் படத்தின் ரிலீஸ் ஒத்திவைக்கப்பட்டது.

இதற்கிடையே, தேர்தலுக்கு முன்பாகவே முழுப் படமும் இணையத்தில் கசிந்து படக்குழுவுக்கு பெரும் அதிர்ச்சியை ஏற்படுத்தியது. இது தொடர்பாக சில கைது நடவடிக்கைகளும் எடுக்கப்பட்டன.

தணிக்கை குழுவின் ‘ஏ’ சான்றிதழ்: தேர்தலில் வெற்றி பெற்று விஜய் தமிழக முதல்வராக பொறுப்பேற்ற நிலையில், படத்திற்கு சென்சார் சான்றிதழ் கிடைக்குமா என்ற எதிர்பார்ப்பு எழுந்தது. இந்நிலையில், கடந்த ஜூலை 9-ஆம் தேதி தணிக்கை வாரியம் ‘ஜனநாயகன்’ படத்திற்கு ‘ஏ’ (A) சான்றிதழ் வழங்கியுள்ளது. படத்தின் மொத்த நீளம் 183 நிமிடங்கள் (3 மணி நேரம் 3 நிமிடங்கள்) எனத் தெரிவிக்கப்பட்டுள்ளது.